« trök

Adjudante

Beste Kaketoevrunj,

Moog ich mich effe veursjtelle:

Pierre Ich bön Pierre Wolters en geine onbekinde in 't Kaketoeriek. Ich bön 5 x 11 + 1 jaor en de zoon van de pap en mam van de Kaketoes, Frans en Keetje, die altied op det benkske zitte mit eder sjpektakel. Es se zo'n eljers höbs dan bösse rap besjmet mit det vastellaovesvirus, mer det vinj ich gaar oet neet erg.

Wie de kienjer nog klein wore, wol ich mit mien vruiwke ouch gaer bie de Kaketoes komme, mer Keetje wol neet oppasse; zie ging zellef väöl te gaer. Toen höb ich de Raod van 11 mer euvergesjlaage, en bön drek bie de Zjwarte gekomme. Det is noe alweer 'n aantal jaore geleje.

Pierre En noe nog draag ich de vereineging ein werm hert toe en maak mich dan ouch verdeenstelik mit allerlei zake. Zo zeet geer mich döks wirke in 't Sjoolpaad ( es miene pap en mam op det benkske zitte ). Same mit Ron, Jan en François doon ich al jaore de bühne en decors te gooi make oppe Bontje Aovendj en det löp altied gesjmeerd !!! Kint geer naogoan waat veer ein geweldig team zeen, dus det zit waal good.

Ich bön 3 x 11 jaor getrouwd mit Margo, ein Kaketoemaedje en Sjoesgirl, en ouch nog ins Boerebroedspaar in 2004 mit adje Jan.

Ich höb d'r heel väöl zin in om same mit uch d'r eine sjoone vastelaovend van te make. Geer komp os mer nao, want de Kaketoes zeen altied dao !!!

Groetjes, Pierre.

Leef Kaketoe vrunj en vriendinne,

François Zo waer se gevraog om in '98 prins te waere, en zo waer se ellef jaor later gevraog om adjudant te zeen. Höb mich altied aafgevraog wiej 't zol zeen om dae mit die vaere de vot nao te drage; dao gaon ich noe dus achter komme.

Veur de miense waat mich nog neet kinne, ich bön François ( DeLange ) Ruijten en höb in 2009 mien 4 x 11 - 4 x 1 jäörig jubeleijem gevierd. Nao 30 jaor lang de peut bie pap ( Frans-Jozef ) en mam ( Henriëtte ) onger de taofel gesjtaoke te höbbe, bön ich in '99 gaon same wone mit Riëtte ( Boerebroedspaar in 2003 mit Robert ( Baerke ) Heilkens ) oppe Richterdael. Ein gooj sjtraot, want dao höbbe heel get prinse van de Kaketoes gewoond. Ein jaor of 8 geleje zeen veer verhoes nao de Sjeijingswaeg, wo veer veurig jaor begos zeen om 't helemaol te verboewe wie det veer det wille. Op 't moment van sjrieve zeen veer nog drök bezig mit sjildere, ich haop det op 't moment van laeze alles klaor is.

Ich bön wirkzaam biej EMCON Technologies ( vreuger Cheswick ) wo ich verantjwaordelik bön veur de kwaliteit van de oetläöt die veer make veur diverse merke personewages. 't Is miene eerste baas en ich bön dao vanaaf maart 1992.

Hobbies höb ich ouch; korfballe bie KV Ready '60 ( taegewäördig in 't gezellige 3de ), skieje, reize, meziek loestere en films kieke. Det ich wiejer haaj van lekker aete en ein good glaas beer op ziene tied, is neet zo'n good bewaard geheim.

Nao mien prinssjap bön ich ingelief bie de Zjwarte Kaketoes en Aad Prinse, wo ich toet de daag van vandaag nog deil van oet maak. Ich höb 6 jaor in 't besjtuur gezaete, wo mien belangriekste taak de techniek waas. Dees funksie höb ich ouch toet 3 jaor trök veur 't BAK vervult.

François en Riëtte Miene link mit ZDH Prins Ron 1 kump vanoet versjillende kenj: hae haet same mit Nicole, mien zöster, 2 prachtige kienjer oppe waereld gezat, wo det Riëtte en ich Sokkertant en Sokkeroom ( ich letterlik ) van zeen. Det zie neet meer biejein zeen moog de pret neet drökke. Wiejer höbbe veer same jaore lang in het 1ste gekorfbalt bie KV Kido '68. Ouch höbbe veer ein paar jaor bie 't zellefde bedrief rondj geloupe oppe Keulsebaan 507. Nao get omzjwervinge höbbe veer 'm inkele jaore geleje ingelief bie de Bühne Boys.

Ich weit det 't ein sjoon seizoen geit waere mit Ron, Pierre en Jan. Natuurlik kinne veer det neet allein, en haop dan ouch det zo väöl meugelik miense mit os mit gaon es veer örges acte de presence motte gaeve.

Ich wins uch allemaol eine sjoone vastelaovend en veer zeen os.

DeLange.

Jan De meiste luuj zólle mich waal kinne, ich bön Jan Fonteijn, zoon van Sjaak van de Sjuur en Annie en gebaore in 't goje jaor 1963. Miens van Monique en pap van mien eige sjter Cheyenne. Gebaore oppe Veldsjtraot in 't riek van d'n Uul, later gewoond in de rieke van de Katers en de Markoef, mer al ein paar jaor aan de Kepel.

Ich bön vanaaf 1985 lid van de Kaketoes, eers es lid van de Raod van Ellef, later Zjwarte Kaketoe mit hert en nere. Ouch bön ich besjtuurslid gewaes. Wiejer wirk ich mit aan de Bontje Aovende van 't BAK en doon nog meer dinger die gedaon mótte waere. Nao ein paar sjole bezoch te höbbe, bön ich in de otowaereld begós, hienao euvergesjtap nao de watersjport, wo in ich later mien eige bedriefke bön begós.

Jan Wiej ich gevraog waerde om adjudant te waere van Ron höb ich nao kort euverligk mit Monique jao gezach. Wiej ich heurde waem nog meer adje zól waere wis ich det d'r weer ein good team sjting. Ron, eine bühneboy en kroegmaot, dan de Witte van de Pin, auch geine verkeerde en last but not least miene soulmaot François, dus hie mót geer ut dit jaor mit doon, mer 't zal uch neet taegevalle.

Kepel, Kemp en Kitskesberg die van 2010 kómme d'r aan en 't zól ein muzikaal sezoen waere mit deze prins. Mer ouch veer kinne det allein es ederein achter ós sjteit: de RVE, de Zjwarte Kaketoes, maedjes, Waat Ein Herrie, Aad Prinse en neet te vergaete ós eige femielies.

Sjone vastelaovend gewins, Jan.