Boerebroelof

Boere Broedspaar 2010

Jeannette sjtelt zich veur:
Hoi, ich bön Jeannette, bön getrouwd mit miene Peter. Veer zeen dökker nao 't landj van Pepijn gewaes, mer dao is nieks van gekómme. Ich bön gebaore oppe Kemp, daonao zeen veer verhoes nao Neel, 't riek van de Katers. Dao is mich de vastelaovend mit de paplaepel ingegaeve. Veur miene dagelikse kos höb ich in de toeszorg gewirk. 't Omgaon mit anger miense lik mich in 't blood. Wie veer aan de Kepel kwame te wone, doerde 't ouch neet lang veurdet ich mich bie de Kaketoemaedjes en de Sjoesgirls höb aangesjlaote. De Sjoesgirls is eine groep vrouwluuj die d'r vastelaovesdinsdaag altied op oet trekke en eder jaor in ein nuuj pekske. Ich höb bie de Sjoesgirls net wiej in 't voetbal 't sjpitsnómmer elf. Van 't ein kwaam 't anger en zo ging ich ouch mitdoon aan de bóntje aovende van 't BAK. Daonao kwaam ich bie 't Kaketoekoor. Eder jaor weer sjpannend de vraog "Kóm ich mit mien sjtum dao waal aan", mer nao ein gooj tas 'koffie' is det toch weer eder jaor gelök.

Aan de Kepel bön ich ouch nog sikkertaris van 't Kapels Buurt Overleg. Same mit ein aantal anger besjtuursleje organisere veer veur de leje ein paar sjoon ivvenemente op jaorbasis mit es doel de saamheurigheid in de buurt de verhoge.

Zo es geer laes haaj ich van väöl lol en plezeer. Lekker aete en drinke is dao ouch heel belangriek bie. Vastelaovesdinsdaag is 't dan zowiet en bön ich boerebroed. Ich verheug mich dan ouch op mien sjardoneetje!

Chris sjtelt zich veur:
Gebaore oppe Scheidingwaeg aan de Kapel. Nao get ómsjwerminge in Herte terech gekómme. In 't dageliks laeve bön ich getrouwd mit Truus, höb 2 kienjer, Tamara en Ceryll dae in 2004 jeugprins waas bie D'n Uul. Veur de kos bön ich facilitairmennejer bie TNT Pos. Mien hobbies zeen vastelaovend, handjbal en de sjötterie. Ich bön vanaaf 1983 lid van de Kaketoes. 21 jaor höb ich deil oetgemaak van 't besjuur, es lid, sikkertaris en veurzitter. Vanaaf mit toetraejing es lid van de Kaketoes höb ich mich bezig gehaje mit de kienjermiddaag. Al jaore doon ich mit aan de bóntje aovende van de sjtichting BAK. 't Vastelaoveskónzaer waas mien sjtokpaerdje en ich haop det det volgend jaor weer ein vervolg geit kriege. Momenteel zit ich in 't dageliks besjtuur van de sjtichting 5x11 Kaketoes. In 1990 waas ich adjudant van Lex I, veurgenger van D'n Uul in det jaor.

Daonao bön ich toegetraoje toet het AAS ('t Aad Adjudante Sindikaat). Ouch maak ich 16 jaor deil oet 't besjtuur van de Bondj van Carnavalsverenigingen Limburg, 't BCL, eine bóndj dae toet doel haet 'das brauchtum vastelaovend zu hegen und pflegen'. In dees 16 jaor zeen veer same mit de euverige besjtuurders Midde op väöl plaatse gewaes óm menig jubilaris in 't zunke te zitte en de Limburge vastelaovend te promote en te sjnoeve, want eder sjtad of dörp viert vastelaovend op zien eige meneer, waat sjoon is óm te zeen. Ongeveer 8 jaor maak ich deil oet van 't dageliks besjtuur van 't SRV, oftewaal de Samewirkende Remunjse Vastelaovesvereniginge. Sins twee jaor doon ich op vastelaovesmaondaag mit aan 't jurere van de optoch in Remunj. Sins kort bön ich ouch lid van de Sofa aan de Kapel.

Nao jaore aktief handjbal gesjpeeld te höbbe bie Sjwif en Victoria en besjtuursfunksies bekleijd te höbbe bie Sjwif en RKSV Linne aafdeiling handjbal bön ich in 1978 o.a. gaon fluite. Mit koppelgenoot Lex bön ich in binne- en boetelandj gewaes. Ouch menig wedsjtried zoot ich op de tribuun es beoordeileer van 't NHV. In 1990 höb ich ein pauze ingelas, mer 't onkroet vergeit neet zodet ich op ein gegaeve moment de veteranekompetiesie veur Inter 69 in 2000 bön gaon fluite in en det doon ich noe nog mit väöl plezeer.

Momenteel gaef ich, 't kint neet angers, jeugscheidsrechterscursuse bie Sjwif 2000 (theoreties gedeilte). Bie de sjötterie in Maerum maak ich 10 jaor deil oet van 't dageliks besjtuur. Menig bedrief of vereniging höb ich dao moge begroete veur eine leuke sjeetmiddaag. Zelf bön ich geine actieve sjöt, mer bön ich meer eine gelaegeheidssjöt. Desondanks mot det bölke d'r vanaaf. Twee bondjsfeeste en 't 50 jäörig besjtaonsfees höb ich organisatorisch mit moge make, waat ederskeer weer ein heel belaevenis waas. Jaore höbbe ich 't van de ziejkantj mitbelaef, mer noe is 't dan zowiet en bön ich boerebroedegom aan de Kepel. Mit Jeanette waer ich in de ónech verbónje op vastelaovesdinsdaag. Weer eins sjoon hoogtepuntj wo veer ós noe al op verheuge. Veer haope det d'r vastelaovesdinsdaag väöl luuj, mer veural väöl kienjer oppe bein zeen aan de Kepel, zodet veer eine sjone kienjeroptoch moge belaeve aan de Kepel.

Jeannette en Chris

3 x 11 Jaor BoereBroelof aan de Kepel

Dit jaor is 't 33 jaor geleje det de boerebroelof aan de Kepel weer nuuj leave waerde ingeblozae. In de 60-er jaore waas d'r ouch ein boerebroelof van de kaketoes. Dae waor in de Hei in de zaal van Driesse gehaaje. Wie dae zaal aafgebrandj waas is d'r aan dees tradiesiej ouch ein inj gekomme. Nao enkele jaore aan de Kepel op vastelaovesdinsdaag gevoetbald te höbbe taege de Famfaar op 't graas teage euver de Kepel, höbbe ein aantal Kaketoes onger angere Sef de Bock en echtgenote en leden van de Sofa 1976 de kop biejein gesjtaoke en zeen es Boerebroelof Kommitee oppernuuj begós. En noe in 2010 kump 't 33ste boerebroedspaar aan de Kepel om de hook kieke. Vanaaf dae tied waerde d'r ouch in alle kefees aan de kepel krintemik aan geboaje. Gesjneje van ein grote mik dae in de optoch mitgedrage waerde. In de optoch waert 't Boerebroedspaar door ós Famfaar veur gegaon en sinds 2003 is de kinjer optoch door de boerebroelof ouch op gepak en mit de boerebroelofoptoch gekombineerd.

Menaazjewage

Neet meer weg te dinke oppe Boerebroelof is de menaazjewage. In 1982 zeen ein aantal miense biejein gekomme en zeen bie Heldens oppe Herkeoesserwaeg achterom eine wage gaon boewe. Hie ware onger angere Piet en Tonnie Allers, Cor van Teeffelen, Hans Allers, Thei Verstegen en Sef Theunissen bie. Vanaaf dae waege waere beer en bloodwors aan de miense oetgedeild. In de eerste jaore waor d'r ouch nog sjlok aan de kienjer door René Allers en Wilco oegedeild. In de loup der jaore is dae wage oetgegreujd toet de menaazjewage zo-es dae noe eder jaor in de boerebroelofoptoch mittrek. Noe waerd d'r gein beer weg gaeve mer, wirt d'r oppe de wage door Piet Allers bloodwors gebraoje en door Tonnie aan de miense gegaeve. 't Maak nieks oet waat wear 't is, d'r zeen altied väöl leefhöbbers aan de kantj van de optoch. De letste jaore wirt ouch eier veur 't Aad Prinse Matinee gebraoje.

3x11 Boerebroelofskommitee

Van links nao rechts: Hans Allers, Wilco Allers, Thei Verstegen, Ger Peters, Piet Schmitz, Eugene Allers, Wim Smeets, Peter Severins, "Börgmeister" Bert Packbier, Piet Allers en Tonnie Allers.

Jaor		BoereBroedspaar
1977		Peter Heijnen & Corrie Busschers
1978		Frans Smeets & Annie Nijssen
1979		Jos Vervuurt & Ine van de Heijden
1980		Funs Sanders & Erna Hilkens
1981		Riek van Ark & Francien Smeets
1982		Rob de Haan & Angelika Sampers
1983		Jan Korsten & Mieke Wolters
1984		Cor van Tefelen & Ria Heeren
1985		Rob Eggermont & Angelique van Schagen
1986		Marcel Dohmen & Ine Niessen
1987		John Schmitz & Petra Packbier
1988		Roel van Ark & Gerlie Hirsch
1989		Jean in het Zand & Marleen Vossen
1990		Erik Cupers & Jacqueline Urselmann
1991		Ben Haasen & Kitty Keuren
1992		Marco Koolen & Linda Damen
1993		Marc Latta & Miressa Beeren
1994		Harrie Willems & Lilian van Schagen
1995		Marc Stienen & Linda Vosdellen
1996		Ton Smits & Shirley Jordan
1997		Harry Cremer & Mieke Coumans
1998		Paul Koelen & Sylvia Koelen
1999		Jan Cox & Miranda
2000		Sjaak van Deurzen & Loes van de Borgh
2001		Marc Allers & Christine Silkens
2002		Wiel Ijsermans & Françoise Neelen
2003		Robert Heilkens & Riëtte Ruijten
2004		Jan Fonteijn & Margo Wolters
2005		Huib Hammer & Esther Hintzen
2006		Alfons Lormans & Anja Schouten
2007		Mario Cubeddu & Nancy Smits
2008		Stephan Cuypers & Chantal Mulders
2009		Walter Boekhorst & Lies van Straten