Jeugprinses Faye I

Hoi,

Miene naam is Faye Wolfkamp. Ich bön bienao 1x11 jaor geleje gebaore in Zjwame en wie ich zes waeke aad waas bön ich, same mit miene pap Frank, mien moder Desiree en miene grote broor Noah, verhoes nao de Sjeidingswaeg aan de Kepel. Ich bön opgegreujd es buurmaedje van aad-prins Jo III (2004) en aad-prins Marvin I (2016) Koolen.

Gesjtart oppe Alfonsussjool zit ich noe in groep 7 van de Synergiesjool, wo ich ‘t enorm nao miene zin höb.

Mien adjudantes Jolie en Seni höb ich lere kinne bie hockeyklup Concordia. Same traine veer twee keer per waek en op zaoterdaag sjpele veer oet of thoes eine wedsjried. Nao aafloup dao van sjpraeke veer regelmaotig aaf en ’t leefs logere veer biej-ein.

Wolfje, mien dwerghangoorknienke woont sins de zomerfekansie bie ós en ich bön gans dol op ‘m. Ich kom bekans neet meer bie van ’t lache es Wolfje wie eine dolle door de woonkamer rent en via ein sjliding toet sjtilsjtandj kump. ’t Bedinke van eine naam veur mien knienke waas euveriges neet zo lestig, aangezeen ich gek bön van wolve. Mien sjlaopkamer is ein groot wolveparadies. Dekbed, kösses, druimevangers, sieradekieske, tas, baeker… ’t leefs höb ich alles van wolve.

Gaer experimenteer ich thoes mit van alles oet de veurraodkas en maak regelmaotig sjliem of kneidgum. Ich haol dan ech letterlik alles oet de kas en gaon door toet det ’t mich gelök is. Ouch knutsel ich gaer, sjpeel ich gaer kapster veur mien Barbi’s en maak ich zellef sierrade. Oprume vinj ich euveriges neet zo belangriek es mam… haha.

Aafgeloupe jaor ware veer oetgeneudig bie ’t oetrope van jeugprins Sjoerd I en dit jaor moog ich zellef jeugprinses van de Kaketoes zeen. Prinses Faye I. Wie gaaf is det! Same mit mien adjudantes gaon veer d’r eine super te gekke tied van make!

Ich haop uch allemaol te zeen, zodet veer same oze Indianedans kinne doon!

Oehoehoehoe!!

X Faye

Foto: Hans Sweegers, Heel

Extra: Download hie de sjlager (MP3).

Extra: Bekiek hie de teks van de sjlager.

Jeugprinses Faye I
Jeugprinses Faye I