ZDH Davy I

Ich bön Davy Tobben, 42 jaor jónk en gebaore in Remunj en opgegreujd op de Heidebaan in ‘t Kaketoeriek. Inmiddels woonachtig in ‘t Plekkersriek in Maerum, same mit mien vruike Kelly en ós allergrootste trots Dyonne en Vayenn. Zoon van Sjaak en Nellie en breurke van Danny Tobben.

In ‘t t dagelikse laeve bön ich werkzaam es accountmanager bie A.S creation, wo ich bedrieve adviseer bie ‘t realizere van alle saorte reklaam veur zowel binne es boete op häör pandj en nog väöl meer. A.S creation sjteit ouch waal bekind om de sjiekste rotonde in Remunj: dae mit dae haan, bie ‘t Retailpark.

Waat ich ‘t allerleefste doon, boete leuke dinger doon mit mien gezin, in miene vrieje tied is vastelaovend viere, voetbal kieke en kilomaeters make op ein van mien fietse. Det doon ich ‘t t leefs mit mien vrunj van RWC Raadgek. Ein ech hobbyklupke, wo plezeer baove de prestatie sjteit. Wo veer same flink lache en ouch aaf en toe meine bes good te zeen. ‘s Zomers oppe waeg en in de wintjer aaf en toe ‘t bos inne. Vreuger höb ich mit väöl plezeer gevoetbald bie SV EMS, mer helaas höb ich mótte sjtóppe door blessures. Noe is ‘t mit name kieke nao det sjpèlke oppe tillevies of op Old Trafford, ‘t Manchester United stadion.

Daonaeve is vastelaovend viere ouch ein passie van mich en is det altied al ein groot óngerdeil van mien laeve gewaes. 30 jaor geleje waas ich namelik jeugprins bie VV de Veldjmuus. Ein sjoon vereiniging die mich kinnis haet laote make mit ‘t vastelaovessjpeel en wo ich teves mien grote leefde Kelly höb lere kinne. Miene liefsjpreuk es jeugprins waas toen ‘Baeter eine vogel in de handj, dan ellef oppe bank’. Dae vogel in de handj waas det toen toeval of waas ‘t veurbesjtump…? Wie dan ouch, dae eine vogel höb ich noe in de handj en det veult fantasties!

Nao heel get jaor her en der van de Remunjse vastelaovend te höbbe gepreuf, kwaam de tied det ós kienjer ouch mit ginge. ‘t Vastelaovessjpeel vierde zie ‘t allerleefs mit häör vrunj en vriendinne aan de Kepel. Sjteeds meer ware veer dao te vinje en greuide veer mit in dees gezellige vereiniging. En wie mich inkele jaore geleje door ein paar men van de raod de roje jas waerde aangepongeld en gevraog waerde of ich mit häör same de vastelaovend wól gaon viere, vonj ich det waal te gek. Waat ein paar sjieke men, ich kwaam in ein werm bad terech en veulde mich dan ouch direk thoes. Ouch bön ich drie jaor aktief gewaes in ‘t 6x11 jubeleijemkommitee, wo veer mit ein supergezellig en hel werkend team ein prachtig en onvergaetelik jubeleijemweekend höbbe neergezat. Dao bön ich erg greuts op. Omdet ich dit zo leuk vonj om te doon bön ich dan ouch sinds kort lid van de sjponsorkemissie die ónger angere haet gezórg veur `t make van weer ein prachtige gezet. En daonaeve waer ich waal ins ‘gebook’ es gelegeheidsarties van Frikkedellevriedaag, waat altied eine geweldige aaftrap is richting de dolle vastelaovesdaag.

Es prins weit ich mich verzekerd van de sjteun van drie fantastiese adjdante: Dennis Wessels, Joep Wolfs en mien broor Danny Tobben. Miene kammeraod Dennis kin ich al van jónks aaf aan en same höbbe veer al väöl sjoon avonture belaef. Fijn det hae ouch dit avontuur mit mich geit belaeve. Dao aan toegevoog nog ein van mien beste kammeräöj: Joep, dae mit ziene dreuge humor ederein aan ‘t lache kin make en hae haet al aardig get ervaring es adjudant opgedaon bie sjtadsvastelaovesvereiniging D’n Uul en de Markoef oet Melick. Hae wit dus wie ‘t sjpel gespeeld waerd. En es lètste en zeker neet de minste: daegene waat mich ‘t langste kint van alle drie. Det is netuurlijk mien broor. Mien hele laeve zeen veer al de allerbeste vrunj en lache veer oppe tied mit ein. Al 42 jaor heel väöl belaef en dao heurt dees belaevenis netuurlijk ouch bie. Hae zól mich vas en zeker mit zien ervaring veurzeen van eine goje raod. Same ein geweldig sjoon sjtel!

Vastelaovesgroete,

Prins Davy I

Foto: Aneta Martens

Extra: Loester hie de sjlager (MP3, gezipt).

ZDH Davy I