Joekskepel "Waat ein Herrie" 1986
De joekskepel is opgerich in 1986, aan de Kepel in 't Zand in Remunj. De eerste jaore waas kefee Parkzicht de toeshave,
mer nao zo'n 3 jaor zeen veer verhoes nao kefee de Post oppe Kepellerlaan. Zo wiej altied waas 't in 't begin neet
gemekkelik. D'r mos allich meziek gemaak gaon waere en dao wore träöte veur neudig. Eine inkeling had hiej of dao get
ligke en ongerstjeund door onger angere de Kaketoes kos d'r nog get bie waere gekoch. Zo kos op ein gegaeve mement toch
ech gerippeteerd gaon waere en trok de joekskepel mit mer leefs 3 nömmers, same mit de Kaketoes, door 't Remunjse
vastelaoveslaeve. In de jaore dao nao kwome d'r heel get nömmers biej en vele d'r ouch aaf. Zo ging det ouch mit de
leje. Veer höbbe flink get aafgesjoojd in en om Remunj en inkele kere flink oetgeweke nao de wienfeeste in Ürzig, om zo
oet te komme in 1997, wie 't 1 x 11 jäörig jubeleijem groot waerde gevierd.
Nao det jubeleijem zeen veer weer wiejer gesjoojd. Veer höbbe, veur zover det veur ein joekskepel te doon is, aan de muzikale waeg getummerd en kinne zegke det veer oetgegreujd zeen toet ein begrip in 't muzikale gebeure van de Remunjse vastelaovend. Zonger det veer d'r erg in hadde vloog de tied om en zeen veer in 2006 toch mer 'ns gaon prakkezere euver ein tweede jubeleijem. Door al os leje is dao mit heel väöl plezeer de sjouwers onger gezat. Veer waerde hiej in gesjterk door ein paar neet leje die os ein heel werm hert toedrage: John Lutjens, Tilman Schreurs en Marc Allers. Op 21 en 22 november 2008 woor 't dan zo wied. 2 x 11 Jaor Waat ein Herrie. Waat ein sjoon fees waas det. Mit ein geweldige resepsie wo väöl vastelaovesvereiniginge en blaoskepelle zich höbbe laote zeen. Ein geweldige gospelmis in de Kepel door mitwirking van oze rector Karel Weerkamp en eine gigantiese feesaovend mit de Rosentaler. Bie deze ederein nog 'ns bedank veur eur mitwirking, op waat veur meneer dan ouch, aan dit fees.
En noe wiejer ... 't eerste vastelaovessezoen zit d'r al weer op en veer zeen weer doonde mit get nuuj sjtökke te rippetere. Veer sjooje weer verder en zeen waal waat d'r in 't veuroetzich lik. Mesjien komp geer os of veer uch nog waal örges taege ... det zol sjoon zeen.
Groete,
Waat ein Herrie
15-09-2009
Klik hie veur de website van Waat ein Herrie.
| Waat ein Herrie is: | ||||
|---|---|---|---|---|
| waem | waat | sinds | ||
| Ingrid Bongartz | alt sax | 1992 | ||
| Nick Bongartz | dieke trom | 1999 | ||
| Mat van de Goor | perkussie | 2006 | ||
| Huib Hammer | erelid | 2004 | ||
| Miriam Keuren | trompet | 1986 | ||
| Paul Latta | erelid | 2000 | ||
| Paul Maas | trombaon | 2004 | ||
| Chantal Mulders | tenor sax | 2007 | ||
| Diede Nelissen | trompet | 2006 | ||
| Maurice Opbroek | trombaon | 1993 | ||
| Sandra Opbroek | sopraan sax | 1994 | ||
| Ellis van de Rotten | trompet | 1992 | ||
| Ben Sampers | deksels | 1999 | ||
| Irene Sampers | alt sax | 1998 | ||
| Rob Sanders | trompet | 2009 | ||
| Ger Schmitz | trompet | 1987 | ||
| Nancy Smits | trompet | 1995 | ||
| Nicole Smits | trompet | 1988 | ||
| Rob Smits | trombaon | 1995 | ||
| Ronald Smits | tuba | 1987 | ||
| Ton Smits | trombaon | 1987 | ||
| Bert op het Veld | klein trom | 1988 | ||
| Aschwin Verheyden | trombaon | 1997 | ||
| Marion Verheyden | trompet | 1992 | ||
| Roel Withoot | tuba | 2007 | ||
