Hallo beste miense!

Gaer sjtèl ich mich aeve aan uch veur.

Ich bön Jasper Sampers, gebaore op zóndaag 6 oktober 2013 in Remunj. Al mien ganse laeve woon ich mit miene pap Ben, mam Irene en broor Rune in ’t Kaketoeriek.

Wie ich nog eine baby waas, sjpeelde miene pap en mien mam bie joekskepel Waat Ein Herrie, dus van jóngs aaf aan höbbe ze mich mitgenaome in de vastelaovend. Zodoende bön ich dus ouch al 1x11 jaor lid van de Kaketoejeug. En det vinj ich fantasties!

In ’t dageliks laeve krieg ich les in groep 8 van de Synergiesjool aan de Herkebosscherwaeg. Adjudant Boaz zit al jaore bie mich in de klas en ouch mien naefke Jona zit op dees sjool, in groep 3.

Naeve sjool höb ich nog ein aantal hobby’s. ’t Leefste gaon ich nao sjool voetballe in de buurt, mer ouch voetbal ich drie keer per waek in ’t jeugteam van SHH Herte. Hie höb ich miene derde adjudant Len lere kinne, wo mit eine goje vrundjschap is ontsjtaon. Ich bön groot fan van die sjoon voetbalklup oet Eindhove: PSV.

Verder haaj ich van vèsse, game en boetesjpele en gaon ich edere vriedaagaovend mit väöl plezeer nao de biejeinkómste van scouting Pater Bleijs. Ouch haa ich van meziek loestere. Miene sjmaak is zeer oeteinloupend: van rock- toet vastelaovesmeziek. D’r is mer weinig det ich neet leuk vinj.

Al jaore is ’t miene druim om jeugprins van vastelaovesvereiniging de Kaketoes te waere. Geer kint uch mesjien waal veursjtèlle wie greuts ich bön det ich in dit jubeleijemjaor de Kaketoejeug veur moog gaon es jeugprins. Zeker neet oppe lètste plaats omdet ich ouch in de vootsjpaore van miene opa, aad-prins Mat I Aarts (1987) en anger femilieleje moog traeje es prins bie dees sjoon vereiniging! Same mit mien adjudante Boaz, Len en Jona én mit uch allemaol gaon veer d’r ein sjoon seizoen van make. Ich höb d’r zin in!

Alaaf!

Jeugprins Jasper I

In dien laeve, alles gaeve!

Extra: Loester hie de sjlager (MP3).