Alaaf!
Ein perseunlik waord van prins Daniël I
Hoi, ich bön Daniël Heynen, 40 jaor jónk en eine gebaore en getaoge Remunjeneer. Mien weeg sjting aan de Prinses Marijkesjtraot aan de Kepel in ‘t Zandj, wo ich mien eerste laevesjaore höb doorgebrach. Al sjnel verhoesde veer nao Hoogvondere, wo ich mien jeug verder höb doorgebrach. Na mien sjtudie bön ich same mit mien vriendin – en inmiddels mien vrouw – Eline gaon samewone in ‘t hert van Remunj, midde in de sjtad. Dao höbbe veer sjoon jaore gehad, mer zo es det geit, kwaam d’r ein moment det veer op zeuk ginge nao ein eige plek. Veer vónje ós eerste hoes in Leeve en höbbe dao ein aantal sjoon jaore doorgebrach. Mer oeteindelik brach ‘t lot ós weer trök nao de Kepel in ‘t Zandj. Sinds 2019 wone veer aan de Herkebosscherwaeg nömmer 1, ouch waal ‘t hoes mit de trappe geneump. Hie woon ich same mit mien vrouw Eline en ós twee jónges, Pim en Joep.
Ich bön de greutse zoon van Hans Heynen en Marianne Bongers, en ‘t breurke van Ruth, Laura en Niclas. Ein grote femilie wo-in ich altied omringk bön door leefde en gezelligheid.
In mien dageliks laeve werk ich es grafisch vormgaever en teamleider bie ein ontwerpsjtudio in Viersen, net euver de grens in Pruuses. Veer zeen veural bezig mit ‘t ontwerpe van produkverpakkinge veur versjillende merke. Mien take zeen beheurlik divers: ich verdeil de projekte, zórg veur de eindcontrole en haaj mich bezig mit de implementasie van ‘t design oppe nuuj verpakkinge. Mer wo mien hert ech sjneller van geit klóppe, is ‘t kreatieve werk. Ich bön eine kunsteneer in hert en nere. Of ‘t noe geit om moersjilderinge, exposisies, artprints, logo’s – doe neums ‘t mer op – es ‘t mer kreatief is, dan bön ich gans in mien element.
Naeve mien werk perbeer ich zoväöl meugelik tied door te bringe mit mien gezin. Same op zaoterdaagmórge nao de mert gaon, langs de kräömpkes sjtruine en vervólges op ein terrasje neerploffe, det is veur mich ’t ultieme gelök. Daonaeve vinj ich ’t heerlik om ein rundje te gaon renne. Nao eine lange werkdaag is det veur mich de beste meneer om de kop aeve laeg te make. Thoes klusse vinj ich trouwes ouch hertsjtikke leuk. Veural in oze wienkelder bön ich döks te vinje, want naeve ’t klusse, verzamele veer dao alle wiene die veer mitbringe van fekansies. En es veer ’t dan toch euver vrieje tied en gezelligheid höbbe: binne oze vrunjegroep höbbe veer ein toepklupke opgerich. Regelmaotig kómme veer biej-ein om ein pötje te kaarte, mit netuurlik ein pilske d’r bie. ’t Zeen de klein dinger die ’t laeve sjoon make, neetwaor?
Mer es d’r ein dingk is, det altied ein grote rol in mien laeve haet gesjpeeld, dan is ’t waal de vastelaovend. Vreuger ging ich mit mien elders mit de kroeg in om ’t fees te viere, en inmiddels doon ich detzellefde mit ós jónges. Vastelaovend zit ech in mien blood. Op jónge laeftied waas ich al adjudant van de jeugprins bie de Haofgengers. Det haet mich toen al laote zeen waat d’r allemaol bie kump kieke en sindsdeen is vastelaovend neet meer weg te dinke oet mien laeve. Eder jaor viere veer de äöpening van ’t sezoen oppe ellefde van de ellefde. En taegewäördig vier ich vastelaovend netuurlik neet allein in de sjtad, mer ouch in Leeve, bie kefee Meneerkes. Det is trouwes ouch de plek wo ich mien vrouw Eline höb lere kinne, in 2009. Zie werkte dao in de bedening, en ’t doerde neet lang veurdet ich doorhaaj det zie de vrouw van mien druime waas.
Sinds veer trök zeen aan de Kepel in ’t Zandj, zeen veer ontzettend werm ontvange door de buurt. Veer höbbe sjnel väöl miense lere kinne. Via ’t vereinigingslaeve, buurtaktiviteite en netuurlik de Synergiesjool wo ós jónges op zitte. Veur mich veult ’t ech es thoeskómme. Dit is de plek wo ich bön opgegreujt en noe moge mien kienjer hie ouch opgreuje. Det guf mich ein bezónjer geveul.
Dit jaor moog ich michzellef greuts prins Daniël neume! Ich veul mich enorm gesjteund door mien veer fantastiese adjudante: Ferdi Schrijnemakers, Jesper Schüren, Frank Vossen en Ralph Wolters.
Ferdi en ich kinne mekaar al meer es 35 jaor. Veer höbbe same op sjool gezaete en heel get avonture belaef in oze jeugjaore, en det doon veer trouwes nog sjteeds. Jesper kin ich zo’n 22 jaor via ’t werk in de horeca. Hae is altied in veur ein feesje en zórg veur de neudige gezelligheid. Frank leerde ich zo’n 15 jaor geleje kinne via Eline, wie zie nog werkte bie Meneerkes. Terwiel zie in de bedening sjtóng, zote veer regelmaotig aan de bar. En Ralph, miene vreugere buurman, is zowaal veur es achter de bar eine goje vrundj. Ouch hem kin ich inmiddels al 15 jaor, en ’t is altied lache mit ‘m. Dit team van adjudante sjteit garant veur plezeer en héél väöl lol, en dao dreijt de vastelaovend toch om!
Ich kiek d’r enorm nao oet om dit vastelaovessezoen mit uch te viere. Same make veer d’r eine onvergaetelikke tied van. Ich kin neet wachte om mit uch te feeste, lache, zinge en danse.
Vastelaovesgroete,
Prins Daniël I
Foto: Aneta Martens
Extra: Loester hie de sjlager (MP3, gezipt).
