Buuttegala
Lache tösse Kérsmis en vastelaovend!
’t Gala der Buuttekampjoene is ein vaste en geleefde tradisie in de aanloup nao de vastelaovend en moog bie de Kaketoes neet ontbraeke. Op ‘derde kérsdaag’ 27 december, organizere de Kaketoes same mit de aad prinse dit humoristiese hoogtepunt in de daag tösse Kérstmis en nuujjaor. Ein aovend wo-op gezelligheid, humor en ein Limburgse vastelaovestradisie samekómme.
In ’t Sjoolpaad dreijt deze aovend volledig om de buut. De buuttekampjoene betraeje ’t podium mit sjèrpe tekste, herkinbare typetjes en ein flinke dosis humor en zelfsjpót. Mit häör rake observasies en komiese verhaole haje zie ’t publiek ein lachsjpegel veur, wo-bie nemes – inclusief zichzelf - waert gesjpaard. ’t Rizzeltaat is eine aovend vól sjaterlache, herkinning en verrassende wendinge.
’t Buuttegala is daomit dé gelaegeheid om same ’t kerstgeveul op ein lóchtige meneer aaf te sjloete en alvas veuroet te kieke op de kómmende vastelaovend. Vrunj, femilie en vastelaovesleefhöbbers vinje mekaar in ein óntsjpanne sfeer, wo lache centraal sjteit en de veurpret veur ‘t vastelaoves-sezoen langzaam mer zeker waerd opgeboewd.
Kórtom: ’t Gala der Buuttekampioenen is dé perfekte aovend om nao de kérsdaag same te kómme, te genete van topbuutte en in de juiste sjtumming te kómme veur alles waat de vastelaovend nog geit bringe.