Prinsematinee
’t Sjtartsjót van de Kepelse vastelaovend!
’t Prinsematinee van vastelaovesvereiniging de Kaketoes vórmp eder jaor opnuuj ’t offesjele en feestelikke startsjót van ‘t Kepelse vastelaovessezoen. Op de tweede zóndaag van jannewarie verangert ’t Sjoolpaad in ’t kloppend hèrt van vastelaovend-vierend Kepel. Leje, miense oet de wiek en vastelaovendleefhöbbers oet de ganse regio kómme dan same veur eine middaag vol tradisie, plezeer en gezónje sjpanning.
Tiedens ‘t Prinsematinee waere de nuje prins, jeugdprins/ -prinses én de Kepelse heks offesjeel geprizzenteerd aan ’t publiek. Waem zól ós ‘t kómmende vastelaovessezoen veurgaon? Dees vraog hingk de ganse middaag veulbaar in de lóch. Mit ein aafwisselend pergram vol meziek, acts, verrassinge en optraejes waerd ’t publiek mitgenaome nao ’t hoogtepunt van de middaag: de bekindmaking van ós nuuj veurgengers.
’t Prinsematinee is euveriges meer dan allein ein bekindmaking. ’t Is ein moment van samekómme, van aje bekinde ontmoete en nuuj herinneringe make. Jónk en aad viert same de rieke vastelaovestradisie die de Kepel en Remunj verbindj. De middaag aomp saamheurigheid, tróts en veurpret veur alles waat nog kómme geit in de waeke d’r nao.
Veur väöl miense is ’t Prinsematinee ein vaste aafsjpraok in de agenda en ’t begin van een periode vol kleur, meziek en fees. ’t Is ‘t moment wo-op de vastelaovend weer toet laeve kump en de vónk euversjleit nao ederein dae dees tradisie ein wèrm hèrt toedreug.
