Remunsje Vasteloavesmért
Op waeg nao de vastelaovend mit dé Remunjse Vastelaovesmèrt!
't Vastelaovesgeveul bars los tiedes de Remunjse Vastelaovesmèrt, ein drökbezoch en kleurriek ivvenement, georganizeerd door de Kaketoes. De mèrt is dé ontmoetingsplek veur ederein dae zich wilt veurbereide op ein nuuj vastelaovessezoen en alvas helemaol in de juuste sfeer wilt kómme.
Mit meer den 55 kräömpkes is d’r ein zeer gevarieerd aanbod te vinje. Dink aan nuje en tweedehands vastelaoveskleijer, heudjes, pette, brille, mötse – zowaal nuuj es kreatief gepimp. Daonaeve is d’r volop gerei verkriegbaar om dien eige vastelaovesoutfit uniek te make, zo és sjtoffe, accessoires en angere materiale om zelf te pimpe. Ouch veur pruke, haorgerei, sjmienk, wimpers en glitters kins se oppe mèrt terech. Netuurlik ontbrik ouch sjone vastelaovesdekorasie neet.
Naeve ’t sjóppe sjteit gezelligheid centraal. D’r is koffie en vlaai, het lekkers te aete, frisdrank en beer, terwiel meziek zórg veur de echte vastelaovessfeer. De antree is gratis, wodoor ederein welkóm is om binne te loupe, róndj te kieke en te genete.
Of det se noe gerich op zeuk bös nao ein komplete outfit, of geweun inspirasie op wils doon: de Remunjse Vastelaovesmèrt is de plek om dien outfit te score veur de ellefde van de ellefde of de vastelaovesdaag. Kom langs en belaef same mit de Kaketoes eine gezellige sjtart van ‘t vastelaovessezoen!