ZDH Prins Ron I
Goojendaag Kaketoevrunj,
Sjoon det gaer dees site höb weite te vinje en natuurlik in 't biezonjer dees pagina wo ich mich mit väöl plezeer aan uch veur wil sjtelle. Haopelik is uch vraog "Waem is det?" aan 't inj van dit stökske proza ein bietje beantjwaord. Zo neet, sjroom neet en sjtap op mich aaf, dan kalle veer effe same. Es 't good is bön ich good te kinne dus geer hoof neet lang te zeuke.
Miene naam is Ron Hausmann, geduip es Franciscus Ronald en 4 x 11 jaor geleje op eine zomerse daag gebaore in 't riek wo de ooievaar nog altied regeert, Den Haag dus. Ich wol zo gaer de waereld ontdekke det ich toen al haaj besjlaote om d'r oppe tied bie te zeen en vandaar det ich ein paar waeke vreuger dan geplend al ins boete kwaam kieke. Ich haaj ech neet verwach det ich es beloning innige tied in ein aquarium kos doorbringe. Ich bön de aaijste van drie, mien zöster en broor make det trio kompleet.
Nao sjool mos ich netuurlik op innig moment ouch; de legere sjool en de brugklas höb ich doorloupe in Den Haag en Voorburg. Op ein gegaeve moment waas 't bliekbaar tied om te verhoeze en de femilie besjloot om aaf te zakke nao Remunj, dun bie de roots van oma die es jonk maedje waas opgegreujd in Neel. Veer zeen in eerste instantie gelandj oppe Donderberg. De sjool aafgemaak op de veurmalige Riekssjolegemeinsjap en neet lang daonao deelgenaome aan ein verplichte 14 maondje doerende perseunlikheidstraening die toen nog regelmaotig waerde georganiseerd door 't Ministerie van Defensie. Oeteindelik bön ich kommies gewaore en nao get angere oetsjtepkes zit ich dao noe nog sjteeds. Ongertusse waas d'r auch nog tied om eine trotse vader te waere van miene zoon Sten en dochter Rinske.
Hobbies zeen d'r netuurlik ouch, vreuger waas det veural korfballe bie Kido. Det renne door 't graas en in eine zaal doon ich al eine tied neet meer, mer om toch aaf en toe get te bewaege (lestig veur ein ambtenaer, ich weit 't) sjtap ich gaer op de mountainbike of de racefiets. Daonaeve is meziek mien grote passie. Ooit es klein menke begos op ein orgel en pas väöl later mien eerste neutjes op een blaosinstrument. Det waas op de träöt bie Fanfare St. Cornelius "t Ketoene Dörp". Dao sjpeelde ouch ein paar leje van bie Hödje Moos en daomit höb ich toen ouch drek mien eerste sjtepkes bie ein Zaate Hermenie gezat. Same mit de Kitsuule ginge veer op paad en zo höb ich weer eine gans angere kantj van de vastelaovend lere kinne.
Van de träöt maakde ich langkzaam de euversjtap nao de sjuuf en rondj dae tied kwaam de vraog of ich mit de kienjeroptoch in de sjtad (waem wit det nog, vastelaoveszaoterdaag vertrekke vanaaf de Sjtasie nao det de Prins van d'n Uul mit de trein waas gekomme) eine daag mit Sjtadsorkes Sjtuf mit kos trekke. Dae eine daag waerde d'r veer en toen is ouch mer metein die tiedelikke verbintenis omgezat in ein vas kontrak. Sinds 2001 zitte veer mit Sjtuf oppe zondaag ein paar uurkes bie de Kaketoe-resepsie oppe bühne. Veur os altied ein van de leuke dinger in os korte sezoen. Ein sezoen det löp van vriejdaag (es veer vreug beginne) toet dinsdaag es veer de eerste leje alweer oppe trein zitte. Daorom kom ich altied gaer efkes get sfeer opsjnoeve en det begint veur mich bie de Bonjte Aovend es veer mit de Bühne Boys d'r wirkelik alles aan doon om de regisseur en veural de artieste te assistere en dao wo veer kinne die op 't gemaak te sjtelle zodet die zich optimaal kinne concentrere. Via de Herrensitzung, Prinsematinee, Verkesbal en ein paar resepties en bezeukskes aan de Kepel mot 't dan toch ech gaon beginne, want dan loup ich al väöls te lang zonger instrument rondj en es ich al die träöote heur ... Ongertusse is mien sjuuf alweer ein bietje verdronge door 't volgende instrument en zuus se mich noe veural mit ein saxofoon. Neet allein toes, mer ouch bie Big Band Boesten, aaf en toe bie 'de Famfaar' en daonaeve nog bie de Autarky Bress Band en in de blaozerssectie van de Appelbende veur get Jazz en Blues.
En dit jaor doon ich 't ein bietje angers. 't Pekske van 't SjtadsOrkes blief in de kas hange en daoveur in de plaats höb ich de eer om de Kaketoes veur te moge gaon es ZDH Ron de Eerste. In ein waord geweldig en ich haop väöl van uch te moge ontmoete om d'r same ouch dit jaor ein heel groot sjpektakel van te make.
Ron I, 2010.
Foto: Hans Sweegers, Heel
Extra: Laes hie de veurpagina van de Kaketoes gezet
Extra: Download hie de sjlager (MP3, gezipt, 5.3Mb)
Extra: Laes hie de teks van de sjlager.
Extra: Bekiek hie de solo van ZDH Ron I op de maedjeszitting.
Extra: Bekiek hie 't oetrope van ZDH Ron I van Omroep Vox.