Vastelaoves- en Ontsjpanningsvereiniging De Kaketoes is statutair opgerich op 15 jannewarie 1956 bie Kefee De Post aan de Kapellerlaan. 't Waord Kaketoes is toet sjtandj gekómme oet de wäörd KA (pel), KE (mp), TOES. Wiej later begin jaore '60 de wieke Kitskesberg en Heide waerde geboewd, zeen ouch dees onger de vleugels van De Kaketoes opgenaome.

Es logo waerde vriewaal vanzelfsjpraekend veur de vogel "Kaketoe" gekaoze; 't orizjeneel logo waerd nog altied gebroek in de uniformering.

Toet en mit ut jaor 1968 kinde de vereiniging geine Prins, mer eine Prizzedent es veurgenger. De eerste Prizzedent waas Jan 1 ( de Wilde ). De achtergrondj hiejvan is det in dae tied eigelik mer éine Prins in Remunj waas, namelik dae van VV D'n Uul. De Prizzedente waerde in de beginjaore ouch geïnsjtalleerd door de Vórs van D'n Uul. Vanaaf 1969 kinne de Kaketoes toet op de daag van vandaag eine Prins es veurgenger.

In eerste insjtansie opgerich om op ein plezerigge meneer same Vastelaovend te viere, greujde de vereiniging al sjnel oet toet ein volwaerdige vastelaovesvereiniging, dae sosjsaal en cultureel ein biedraag göf aan de gemeinsjap.

Vanaaf de oprichting zeen de Kaketoes herkinbaar aan de rooj / blouwe uniformering van de Raod van Ellef, wèlke, waal in versjillende hoedanigheje, al die jaore is gebleve. Dees kleure kómme euveral in trök, wiej de uniformering van de neet RVE leje ( mötse, hesjes ), medaaliejs etc.

Al vriej vreug ( vanaaf 1959 ) brach de vereiniging jaorliks ein vasteloavesgezet oet, dae binne de wieke waerde verkóch. Ouch dees tradisiej waerd toet op de daag van vandaag veugezat, get wo veer erreg greuts op zeen.

't Eerste juubeleijem ( 1 x 11 joar ) waerd bereik in 1967 mit es Juubelei-jeprizzedent Peter 1 ( Munnix ), dae later ouch nog veurzitter van de vereiniging is gewaes en neturelik ein van de grótste initiators van de Kaketoegezet. Hae ontveel ós vlak veur het 4 x 11 juubelei-jem. Al greujende waerd in 1978 het 2 x 11 jaórig juubeleijem bereik, eine mielpaol veur de Kaketoes, want in dit juubelei-jemjaor met Juubeleijemprins Ton 1 ( de Bock ) waerd 't Kaketoebeeld op 't veldj veur de Kapel in 't Zand onthuld. In dees jaore waerd de vereiniging geleid door de Grootvórs van Remunj, Bair Cox. Wiej deze halverwaege de jaore '80 waeges serjeuse zeekte zien funksie mós neerligke en vlak daornao sjtórf, noom Paul der Kinderen 't sjtekske van dem euver, aevel neet es Vórs, mer es veurzitter van de vereiniging. Dees funksie haet hae toet 't begin van de jaore '90 uitgeveurd, wiej ouch hae ós helaas ontveel. Toet 2006 kinne de Kaketoes geine vórs, mer eine veurzitter es ein van de veurgengers van de vereiniging. Mer de Kaketoes zolle de Kaketoes neet zeen, es veer neet zo noe en dan ins get nuujts doon. Op 11 november 2006 is Marc Allers és eerste Vórs van VV de Kaketoes geïnstalleerd.

In 1989 waas het tied veur 't 3 x 11 jaórig juubeleijem met Juubeleijemprins Huub 1 ( Salden ). Ein beeld waas dr al, 't waas aevel tied veur modernisering van de uniforme. In det jaor waerde de bekinde rooj slipjes en nuuj mötse veur de Raod van Ellef ingeveurd. Ouch zeen dr in dét jaor kleinere beeldjes gemaak, diej waat toen zeen oetgereik aan edereen dae de Kaketoes een werm hert toedroge.

Jaomer genóg móste veer in 1991 oetwieke nao de aaj I.T.O. sjool mit ós grote aktiviteite; de zaal van de famfaar, wo al die jaore de aktiviteite waerde gehaaje, waerde aafgebraoke. Gelökkig kóste veer in 1993 terech in de aula van de MAVO aan 't Sjoolpaad. Dees aula zól oeteindelik besjtump waere es nuuj gemeinsjapshoes van de Kapel. Oeteindelik waerd in 1995, door eendrachtige samewirking van alle vereiniginge aan de Kapel, ein nuuj gemeinsjapshoes gerejaliseerd aan 't Sjoolpaad, wodoor alle Kapelse vereiniginge weer ein sjoon en grote lokaasiej haaje veur häör aktiviteite.

Zo zeen veer aangelandj biej 't 44-jaórig besjtaon van de Kaketoes in 2000, mit es Juubeleijemprins Jos IV ( Vervuurt ). Dit juubeleijem is gevierd mit es doelsjtelling: "De ganse gemeinsjap haet fees !" De uniformering waerde up to date gebrach en veur ederein van jonk toet aad waerde aktiviteite georganiseerd. Hoogtepunt woor beveurbeeld de juubelei-jemmès in de Kapel in 't Zandj, dae in 't remunjs dialek waerde gehaaje. Vanaaf dae tijd waerd jaoreliks ein waek veur de vastelaovend een dialekmès gehaaje in samewirking mit de vastelaovesvereiniginge de Kitsuule en Koelbertus, diej ouch häöre basis höbbe in Remunj Zuid.

Ein anger hoogtepuntj waerde verzorreg door de club van Aad Prinse van de Kaketoes: Ein eigese vereinigingsvlag, dae ónger 't vastelaovessezoen aan sjteeds meer hoezer in Remunj en wied daoboete greujts wappert.

De Kaketoes zeen neet allein ónger de vastelaovestied ( 11 november t/m asgoonsdaag ) bezig, mer ouch daoboete. In dezen tied waere alle eige ( vasteloaves ) aktiviteite georganiseerd, wiej beveurbeeld 't oetbringe van de Kaketoegezet, de Kienjermiddaag, de jaorelikse Boerebroelof op vastelaovesdinsdaag en natuurlik 't Prinsematinee ( 2de zondaag in jannewarie ) wo de nuuj veurgengers bekind waere gemaak en häör resepsie op vastelaoveszóndaag.

Ouch waerd beveurbeeld door ónger meer de enveloppeaksie al jaorelank biejgedrage aan 't jaorlikse oetsjtepke veur de aajere en kranke luuj oet ós riek mit behulp van De Zonnebloem, mitgewirk aan de organesaasie en oetveuring van de Wiekfeeste Kapel in 't Zand ( Oranjemert, Kepelse Kirmes en Braderie ) en wiejer euveral wo een beroop op ós waerd gedaon.

Eder vereiniging mót mit häöre tied mitgaon en de Kaketoes loupe daomit döks veurop; Dök trendsettend mit aktiviteite en de organisaasie daovan, mit leje en väöl anger luuj boete de vereiniging die eine bandj mit mekaar en mit de gemeinsjap höbbe dae d'r veur zorreg det zowaal vereiniging es gemeinsjap jonk van geis en sjerp blief. Zónger gemeinsjap gein vereiniging; Eine prins, toch de belangriekste persoon ónger ein vereinigingsjaor, is in de eerste plaats reprizzentant van ós gemeinsjap, daonao pas van de vereiniging.