Adjudante

Hallo luuj,

Nooit gedach det ich mich hie nog ins aan uch kós veursjtelle. ‘t Waas tiedes ein intervaltraining in ‘t Dalheimerbos, toen miene fietskammeraod Steffert te Meij mich vroog of ich adjudant wól waere van de nuje dórstlustige hoogheid van de Kaketoes. Eerlik gezag waas ich op dees formele vraog al een bietje veurbereid...

Rudi haaj eerder bie mich al ins de temperatuur opgenaome, omdet d’r wit det ich van feeste haaj, mer neet zo van die verplichtinge. Ich höb ‘m toen gezag det ich hie pas serjeus euver wól naodinke es ‘t ouch ech zo weid waas.

Ich kós ‘t netuurlik neet laote dit thoes ouch al ins veurzichtig in de weik te ligke, omdet ich dit neet allein kin besjlisse. Thekla zoog det geliek zitte. Toen Rudi mich ein paar waeke later zag det d’r mich neudig haaj, kós ich geliek zègke det d’r op mich kós raekene en det veer d’r same ein groot fees van gaon make! Get det waal aan ós is toevertroewt.

Als aajste broor kin ig Rudi al vanaaf zien geboarte. Hae haet altied teage mig op gekeke, noe is der eine kop groter en kiek ig taege hem op.

Gebaore bön ich aan de voot van de Galgeberg en op de Heinsbergerwaeg opgegreujt toetdet ich zellef kós vlege. Ich bön same mit mien vruike Thekla gelandj in Melick, wo ver inmiddels al ellef jaor wone. Same höbbe veer twee prachtige dochters, Luna van 8 en Yfke van 5. Mien cente verdeen ich bie Boels verhuur.

Veur de miense die ‘t mesjien neet (meer) weite, in 1985 bön ich sjoolprins gewaes op de Alfonsusjool. Miene spreuk van toen is noe nog döks van toepassing: ‘Mit Erwin van de Kepel, gaeve veer um ein lel. Alaaf.’

Sjoon det veer eine vastelaovend aan de Kepel ins op dees meneer moge mitmake.

Vastelaovesgroete,
Adjudant Erwin


Beste vastelaovesvierders,

Sjoon om mich aan uch te moge veursjtelle.

Miene naam is Marcel Silkens. Ich bön 43 jaor geleje ónger aan de voot van de Galgenberg gebaore en nao ein paar jaor 300 maeter wiejer oppe hook van de Heinsbergerwaeg en de Petrus Polliussjtraot groot getaoge. Ich bön de middelste van de drie breurs Silkens.

Es oer Kepelse jóng ging ich nao de Alfonsussjool, zoot ich bie scouting Pater Bleijs en deende ich de mès aan de Kepel. Zellefs mien veurtgezat óngerwies höb ich gevolg op ‘t Sjoolpaad. Noe nog b:on ich sjteunend lid van de Kepelse motorklup MCCA.

Nao 32 jaor aan de Kepel te höbbe gewoond en wie alle boewgróndj allang vergaeve waas, bön ich in Herte tösse de Waterratte gaon wone. Ich woon same mit mien Ruivers maedje Evelien Boonen en same zeen veer verriek mit twee prachtige kienjer. Julia van 9 jaor, det al jaore ein rol vervuld in de Kienjer Musical bie D’n Uul en Daan van 7 jaor, dae dink det ‘t ‘t ganse jaor door vastelaovend is.

Veer zeen gewindj om es femilie tiedes de vastelaovend tösse de aktiviteite van versjillendevereiniginge te bewaege. Mer dit jaor is det angers. Wie sjoon is ‘t om mit alle breurs en kameraod Sjra same oppe buun te sjtaon en ‘t sjpektakel ins vanoet ‘t vereinigingslaeve mit te make ónger de vlag van de Kaketoes. ch gaon ‘t mitmake!

In ‘t dageliks laeve bön ich werkzaam es serviceplanner bie Frissen Intern Transport in Valkenburg. Wiezo werke in Valkenburg? In ‘t Bourgondische zuje goje ze de tent nog toe mit vastelaovend! Ein ech femiliebedrief wo oze dorslustige hoogheid Rudi es balieverkaupmitwirker bie Frissen Groen Techniek is gesjtart en later es vertaegewäördiger van graasmeijers en grondjverzatmesjiener. Mer ja, es graassjpesjalis vonj d’r ein paar jaor geleje netuurlik greuner graas!

Ich gaon nog gaer aaf en toe op sjtap en haaj van ein feesje oppe tied. Allein mein ich altied det ich toet ‘t lets mót blieve (femiliekwaol). Sjpórte doon ich ouch, en waal winjtersjpórte. Eder jaor vertrekke veer ein waekske mit eine groep men (de meiste aad-Kepelse) nao Oosteriek om te snowboarde. Dus, lets jannewarie mót de prins mich effe misse, want dan bön ich op trainingskamp.

Vastelaovend viere zit mich van jóngs aaf aan in ‘t blood. Ich kin mich neet heuge det ich ein jaor höb euvergesjlage. Lang geleje waas ich al adjudant van de jeugdprins oppe legere sjool en ein jaor later waas ich zellef jeugprins van KSV Swift. Dit jaor zól ich de grootste prins van Remunj letterlik en figuurlik ongersjteune.

Maak der allemaol eine sjone tied vanne!

Toet sjnel
Adjudant Marcel


Daag Kepel,

Wilt geer weite: waem ich bön, wo ich woon, bie waem ich heur, en waem ich höb gemaak? Kiek dan mer trök in de gezet van 2018. Op det gebied is d’r nieks verangerd en ich haaj neet van herhaolinge…

‘t Waas weer ins eine typische typische klusmiddaag mit ‘de blauwe’ (Tom Jacobs, prins 2018, red.). Eers get plenk sjildere bie ‘m, bie mich get aete en aansjloetend tegels plekke en tot sjlót vanzelfsjpraekend evaluwere mit ein glaeske beer. Veer zote net es miene tillefoon geit. Steffert Te Meij versjeen in mien sjermpke. Zo naief es ich bön naem ich op en Steffert begint zien verhaol. Pas op ‘t moment det Steffert ‘t waord ‘veurgenger 2020’leet valle dach ich, ich mót effe pleite hie. Dalik wit de blauwe al wie en waat.  Wie Steffert mich vroog om es adjudant de nuje veurgenger bie te sjtaon dach ich metein: ‘Nae, det doon ich neet. Geine zin in, ‘t is te rap nao 2018. Mer ich wilde det neet zo direk bringe, wo-op ich aangoof d’r euver nao te mótte dinke.

‘t Thoesfront zag metein ‘jao, det mós se doon’. Ich bleef d’r bie det ich ‘t neet wilde doon, haaj anger planne en zoog ‘t ouch neet gebeure. Mer nao ‘t weekend waas ich d’r oet : ich doon ‘t allein es dae pesoon heel dich bie mich sjteit. Op dit moment zeen det mien broor en ‘Mesjiener’ (Rudi Silkens, red.). En ich waas d’r ouch heilig van euvertuug det die ‘t neet zólle waere. Zeker Mesjiener neet. Dae haet ouch grenze, dach ich.

Ich sjrók mich dan ouch kepot wie ich heurde det ich dus mit ging doon in t sjpeel. ‘t Kwartje veel in eerste instansie neet. ‘t Mósde effe lanje. En aangezeen veer eine lange veurgenger höbbe, doerde det waal effe. Mer nao de eerste vergadering waas ‘t dudelik. Ich höb d’r zin in en veer dinke det alles geit...

Esse mich of Rudi 25 jaor geleje gezag haajs det veer same ‘t prinselik gezelsjap van 2020 zólle zeen, dan haje veer dich veur gek verklaord en mesjien nog erger. Nae, veer ware neet bepaold vrunj. Det is noe waal angers. Ich höb altied aangegaeve det Rudi noe eindelik mien grepkes begriep. Versjtand kump mit de jaore zègke ze waal ins…

Zo höbbe veer in ‘t verleje väöl samegewerk in häöf. Wobie Rudi altied op ‘t mesjienke zoot, aanwiezingen zoot te gaeve en vertelde det d’r ‘t zjwaor haaj. De angere, ich de aezel, waas aan ‘t sjöppe en ‘t maore om de planning van meneer kloppend te kriege. Dao op ein moment waas d’r op de knieje ein zandjbed aan ‘t make. Ich zoog zien ‘sjpaarpötje’ en sjnapde metein waat ich mós doon. Zo sosjaal es ich bön goojde ich ‘m get zandj in de vót. Det haaj ich neet mótte doon.  Nao eine houp gesjelj en getier zoot d’r weer trök op zien mesjienke en dao is d’r sindsdeen noojt meer vanaaf gekómme. De naam sljavedriever waas gebaore. ‘t Is ein good jónk en veer kinne good mit ein euverwaeg.

Vastelaovend same!

Adjudant Sjra

Adjudant Erwin
Adjudant Erwin
Adjudant Erwin
Adjudant Marcel
Adjudant Marcel
Adjudant Marcel
Adjudant Gerard
Adjudant Gerard
Adjudant Gerard