Adjudante

Leef miense,

Moog ich mich aeve aan uch veursjtelle. Ich bön Peter Nelissen, 55 jaor en getrouwd mit Lenie. Same höbbe veer twee sjoon dochters en zeen veer heel gelökkig mit de mèn die dao bie heure, ein sjiek sjtel biejein. Geer kint mich waallich nog van mien eige prinssjap bie dees sjoon vereiniging in 2006. Det waas ein ervaring om nooit meer te vergaete. Enige tied geleje vroog Tom nao ‘t aete of veer dit jaor hem wilde biesjtaon tiedes zien prinssjap. Det waas ein komplete verrassing, en nao get wikke en waege höb ich metein jao gezag. Nog eine keer ‘t sjpeel van dun bie mitmake liek mich fantasties. Ich weit zeker det veer same mit Dennis, Servaes, Gerard en oze veurgenger Tom I d’r ein knallend sezoen van gaon make. Want, ‘t Laeve vaazel, waat eine waazel!

Adjudant Peter


Daag luuj en leef Kaketoes,

Veur de meiste hoof ich mich waarsjienlik neet veur te sjtelle. Ich dink waal det ein aantal van uch zich aafvraoge worom ich. Dae waerd toch vlak veur de vastelovend veur de tweede keer vader? Jao, det klop! ‘t Waas ouch heel vraemp det Tom mich vroog om ziene adjudant te waere. Hie mós ich good euver naodinke en ouch zeker mit Maike euverligke.

In eerste instansie haaj ich mich nog neet ins gerealizeerd det de vastelaovend bienao geliek vèlt mit de gebaorte van oze tweede zoon. Maike attendeerde mich dao op. Maike en ich ware d’r eigelik sjnel oet. ‘t Thoesfront sjteit volledig achter mich, mer ‘t gezin sjteit vanzelfsjpraekend op de eerste plaats. De kans is dus groot det ich gedoerende ‘t sezoen effe d’r tösse oet bön. Mit dees veurwaarde ging ich ‘t gesjprek aan mit Tom. Det gesjprek waas euveriges heel kort. Ouch hae vónj ‘t neet meer dan normaal det mien gezin op ein sjteit ‘en es det beteikent det se d’r neet altied bie kins zeen, dan is det zo’, waas zien antjwaord. Wie dees plooi glad waas gesjtreke goof ich veur hongerd percent greun leeg en ich vinj ‘t ein enorme eer om deil oet te moge make van ‘t prinselik gezelsjap 2018 van de Kaketoes!

En veur degene die ‘t nog neet weite: ich woon same mit mien vriendin Maike oppe Sjeidingswaeg. In 2016 is oze eerste zoon Jelle gebaore dae noe al grote broor waerd. Waat zól d’r greuts zeen, net zo wie pap en mam. In ‘t dageliks laeve werk ich in ’t sjpesjaal óngerwies. Boete de fekansies om perbeer ich jongere die ‘t get lestiger höbbe om regulier les te volge, te helpe en te begeleide. Naeve de didactiek sjpeelt de pedagogiek ouch ein belangrieke rol in mien werk. Neet altied aeve mekkelik, mer waal oetdagend. Ich höb Tom lere kinne in de veurmalige brasserie van ‘t Outlet Center. Dao höbbe Tom en ich gólje tieje gehad. Veer sjtinge in de sjpeulkeuke en wie gek ‘t ouch klink, ‘t waas ein paradies. Veer haje meziek, eine eige sjlager, veer moogde rouke en veer haje altied genóg te aete, want alles waat verkeerd gemaak waerde moogde veer verwerke. Ich höb Tom dao ouch geleerd wie se ekstra oere kins make, dus meer salaris. Zo haje veer ins ein fees georganizeerd. Mit oprume gooide ich alles ‘t magazien in. Tom zag: ‘Waat duis doe? Det mót netjes waere opgeruump.’ Wo-op mien antjwaord waas: ‘Det weit ich, mer det doon ich mórge, dan höb ich weer get te doon.’ Naeve ‘t werk ginge veer döks same op sjtap en verkochte veer väöl sjaele zeiver. En 15 jaor later doon veer det nog sjteeds.

Vastelaovend same!

Adjudant Gerard


Daag vastelaovesvrunj,

Ich bön Servaes Engelen, veur väöl luuj baeter bekind es Väös. Es kleine jong bön ich groot gewaore in Vlorp. Inmiddels bön ich 30 jaor en woon ich same mit mien vriendin Bjon en oze hóndj Fubar in Brachterbaek.

In ‘t dageliks laeve verdeen ich mien cente es sjpeurhondjgeleider bie defensie. In ‘t weekend riej ich gaer mit adje Sjra en de men van RWC Raadgek ein rundje oppe wielrenfiets of de mountainbike.

Wie ich Bjon leerde kinne kreeg ich Tom d’r graties bie es sjoonbroor. Tom en ich haje geliek eine sjterke bandj, mer door al ‘t klusse in ós hoeze en de neudige feesjes waerde dae bandj sjteeds sjterker. Ouch doerde ‘t neet lang veurdet ich besjmet waas mit ‘t vereinigingsvirus. Al sjnel waerde ich dan ouch gevraog om es ‘roje’ mit te trekke mit de Kaketoes. In ‘t jaor 2016 bön ich same mit Bjon oetgerope es boerebroedspaar aan de Kepel. Hie waas Tom miene getuge. Door ós twee jaorlikse manne-oetsjtèpke same mit adje Sjra es ós vrouwluuj weer ins op scoutingkamp zeen, blief de bandj tösse Tom en mich greuje.

Ónger ‘t mom van detzellefde manne-oetsjtèpke waerde ich op eine vriedaagaovend nao Sjra gelok. Zie mósde veur det veer ein hepke zoude gaon aete nog efkes eine kas nao ónger sjouwe, en of ich aeve wilde helpe höffe. Einmaol dao bleek d’r geine kas te zeen. Tom en Sjra mósde mich get vraoge. ‘Väös, ich waer prins bie de Kaketoes, wils dich miene adje waere? Wo op det ich zei’: ‘Jao, grepke zeker’. Ich geluifde ze allebei neet, want veer weite allemaol det Tom en Sjra ós gaer veur de gek haje.

Nao väöl meujte vanoet häöre kantj en ein bietje hulp van Maike (van Sjra) waat mich vertelde det ‘t toch echt waor waas geluifde ich ze dan eindelik. Lang hoofde ich hie neet euver nao te dinke. Tuurlijk doon ich det. Veer gaon d’r same ein fees van maken.

Sjone vastelaovend same!

Adjudant Servaes


Daag luuj,

Miene naam is Dennis Bogman. Ich bön 28 lentes jónk, vriegezel en woon oppe Lindelaan in Remunj in ein sjoon appartement. In ‘t dageliks laeve verdeen ich de kós es masjienis bie de NS.

In miene vrieje tied doon ich gaer fitnesse en aaf toe in de zomer doon ich ouch mit get vrunj nog get voetballe d’r bie. Dit om toch nog ein bietje in balans te blieve, want in de weekende bön ich zeker neet vies van ein good glaas beer. Ich kiek ouch gaer nao de Formule 1 en volg veurnamelik ouch ‘t boetelands voetbal. Dink hie bie aan de Premier League en de Champions League.

Tom dae kin ich al vanaaf de crêche en veer höbbe bie ein in de klas gezaete oppe basissjool en ware gooj vrunj. Oppe middelbare zeen veer allebei op angere sjole terech gekómme en höbbe veer tiedelijk gein kontak gehad. Via eine vrunj bön ich in mien tienerjaore toch weer bie Tom oetgekómme en eigelik waas ‘t geliek weer es vanaads. Sindsdeen zeen veer altied gooj vrunj gebleve.

Wie Tom mich belde of ich 10 menute tied haaj omdet hae mich get mósde vraoge, wis ich eigelik al metein wie laat ‘t waas. Tom zag namelik altied ‘es ich ooit prins waer, dan waers doe miene adjudant. Dan kump se op dees meneer waal bie de vereiniging.’ Ich höb d’r toch twee daag euver nagedach, omdet ich normaal eigelik altied mit miene vrunjegroep de vastelaovend vier en d’r in de weekende ouch kwaliteit mót weare geleverd bie de NS. Toch leek ‘t mich sjoon om de vastelaovend ins eine keer mit ein vereiniging mit te make en nuuj luuj te lere kinne.

Veer höbbe d’r heel väöl zin in mit ós gezelsjap en ich weit zeker det veer d’r mit zien alle ein geweldig sezoen van gaon make.

Groete,

Adjudant Dennis

Adjudant Peter
Adjudant Peter
Adjudant Peter
Adjudant Gerard
Adjudant Gerard
Adjudant Gerard
Ajudant Servaes
Adjudant Servaes
Adjudant Servaes
Adjudant Dennis
Adjudant Dennis