ZDH Tom I

Leef luuj,

Zo wie de titel van ein legendaries vastelaovesnömmer al klink, ‘Hiej bön ich dan’. Veur de luuj die mich nog neet kinne, ich bön Tom Jacobs, 29 vastelaoves aad dolgelökkig mit mien maedje Diede Nelissen. Veer zeen momenteel in de letste fase van ein grote verboewing van ós hoes oppe Scheidingswaeg in Remunj in de sjoonste wiek Kepel in ‘t Zandj. Verboewe zit ós waal in ‘t blood, want veer höbbe al kinne oefene mit ein grote verboewing in ós veurige hoes in Neel. Mer good, Neel blief Neel en ós hertje ligk aan de Kepel.


Ich bön gebaore en getaoge in Remunj en wil hie zeker neet meer weg. Mien pap en mam, Tjeu en Marleen, höbbe mich groot gebrach en gezórg det ich snjel op eige bein kós sjtaon. Nao mien universitaire opleiding aan de kleutersjool bön ich mich versjillende vakke gaon aanlere, omdet ich te väöl zake intersant en sjoon vinj om te doon. Oeteindelik bön ich in de managementwaereld terechgekómme en nao get werkervaring bie Wim Cox en in de rekreasiebranche te höbbe opgedaon bön ich recent begós aan ein sjoon managementfunksie bie de Hakpro groep. Ondanks det de eigenere totaal gein affiniteit mit vastelaovend höbbe, höbbe ze mich toch alle mitwirking gegund om dit prinssjap te kinne verwezelikke.

Mien hobbies zin ouch nogal oeteinloupend. Zo bön ich al ein aantal jaor lid van dees sjoon vereiniging en gaon ich gaer mit mien maedje d’r op oet om de waereld te verkinne. Netuurlik gaon ich mich gaer eine drinke, wo ich mich ein sjoon ekskuus veur höb geregeld, de sjpaarkas van kefee De Post. Ein anger hobbie van mich is meziek. D’r zólle vas eine houp luuj mich dao ouch van kinne, omdet ich jaorelangk in alle windjstreke te vinje waas es deejay. Dees hobbie höb ich momenteel op ein leeg pitje sjtaon. Ich beperk mich momenteel nog mer toet inkele ivvenemente per jaor.


Vastelaovend zit mich in ‘t blood. De meziek dreij ich ‘t ganse jaor en ‘t feest op zich vinj ich fantasties. Ich wil d’r dan ouch zo min meugelik van misse.


Mien adjudante keze waas neet zo lestig. Ich ambieerde altied al om prins te waere en es ‘t zover zól zeen, zólle dit ouch de mén zeen die ich zól vraoge. Gelökkig dachte Dennis, Servaes, Sjra en Peter dao net zo euver. Ich gaon op paad mit ein fantasties gezelsjap en bön ouch blie det ich kin trökvalle op de ervaring van aad-prins Peter IV. Waem ich zeker neet wil vergaete zeen de maedjes Diede, Lenie, Bjon en Maike. De sjteun en alle energie waat zie d’r in sjtaeke is werkelik toet noe toe al helemaol geweldig.


Mit dit gezelschap zól ich toch neet altied meer ‘altied de letste’ zeen?

Luuj, veer zeen ós en bedank alvast veur ‘t lache.

ZDH Tom I

Foto: Hans Sweegers, Heel

Extra: Download hie de sjlager (MP3).

Extra: Bekiek hie de teks van de sjlager.